ഗ്രാമസഭ

ഗ്രാമസഭ എന്താണ്?

         ജനാധിപത്യത്തിന്‍റെയും അധികാര വികേന്ദ്രീകരണത്തിന്‍റെയും അടിസ്ഥാന ശിലയാണ് ഗ്രാമസഭ. ജനങ്ങൾക്ക് ഭരണത്തിൽ നേരിട്ട് പങ്കാളിത്തം ലഭിക്കുന്ന ഏക ഭരണഘടനാ സംവിധാനമാണിത്. മഹാത്മാഗാന്ധി വിഭാവനം ചെയ്ത ഗ്രാമസ്വരാജ് എന്ന സങ്കല്പം യാഥാർത്ഥ്യമാക്കുന്നതിനുള്ള പ്രധാന ഉപാധിയാണ് ഗ്രാമസഭ.

   സമ്മതിദായകർക്ക് തങ്ങൾ തെരഞ്ഞെടുത്ത ജനപ്രതിനിധികളുമായി നേരിട്ട് സംവദിക്കാനും വികസന പദ്ധതികൾ ആസൂത്രണം ചെയ്യുന്നതിലും ക്ഷേമ പദ്ധതികളുടെ ഗുണഭോക്താക്കളെ തെരഞ്ഞെടുക്കുന്നതിലും പങ്കാളികളാകാനും ഗ്രാമസഭ അവസരമൊരുക്കുന്നു.

• ഗ്രാമപഞ്ചായത്തിന്‍റെ നിയോജക മണ്ഡലം അടിസ്ഥാനമാക്കിയാണ് ഗ്രാമസഭ രൂപീകരിക്കുന്നത്.
• ഒരു നിയോജക മണ്ഡലത്തിലെ മുഴുവൻ സമ്മതിദായകരും ഗ്രാമസഭയിലെ അംഗങ്ങളാണ്.
• ബന്ധപ്പെട്ട ഗ്രാമപഞ്ചായത്ത് അംഗമാണ് ഗ്രാമസഭാ കൺവീനർ.
• ഗ്രാമപഞ്ചായത്ത് പ്രസിഡന്‍റാണ് ഗ്രാമസഭയുടെ അദ്ധ്യക്ഷൻ.
• ഗ്രാമപഞ്ചായത്ത് നിശ്ചയിക്കുന്ന സ്ഥലത്താണ് ഗ്രാമസഭാ യോഗം ചേരുന്നത്.
• ബ്ലോക്ക് പഞ്ചായത്ത് അംഗം, ജില്ലാ പഞ്ചായത്ത് അംഗം, നിയമസഭാംഗം എന്നിവരെ യോഗത്തിൽ പങ്കെടുപ്പിക്കാവുന്നതാണ്.

• 10 ശതമാനത്തിലധികം സമ്മതിദായകർ രേഖാമൂലം ആവശ്യപ്പെട്ടാൽ പ്രത്യേക ഗ്രാമസഭാ യോഗം വിളിച്ചുചേർക്കണം.

• സമ്മതിദായകർക്ക്  ജനപ്രതിനിധികളുമായി നേരിട്ട് സംവദിക്കാൻ അവസരം ലഭിക്കുന്നു.

• വികസന പദ്ധതികളും ചെലവ് വിവരങ്ങളും ആദ്യയോഗത്തിൽ ഗ്രാമസഭയ്ക്ക് മുമ്പാകെ അവതരിപ്പിക്കണം.

• ക്ഷേമപദ്ധതികളുടെ ഗുണഭോക്താക്കളെ തെരഞ്ഞെടുക്കാനുള്ള ചുമതല ഗ്രാമസഭയ്ക്കാണ്.

വികസന വിവരശേഖരണം 

പഞ്ചായത്തിന്‍റെ വികസന പദ്ധതികൾ ആവിഷ്‌കരിക്കുന്നതിന് ആവശ്യമായ വിവരങ്ങൾ ശേഖരിക്കുന്നതിനും സമാഹരിക്കുന്നതിനും സഹായിക്കുക.

പദ്ധതികൾക്ക് മുൻഗണന 

വികസന പദ്ധതികൾക്കും പരിപാടികൾക്കും രൂപം നൽകുകയും മുൻഗണന നിർദ്ദേശിക്കുകയും ചെയ്യുക.

സന്നദ്ധസേവനം 

വികസന പ്രവർത്തനങ്ങൾക്ക് ആവശ്യമായ സഹായങ്ങളും സന്നദ്ധ സേവനവും നൽകുക.

പൊതുസൗകര്യങ്ങൾ 

തെരുവ് വിളക്കുകൾ, പൊതുടാപ്പുകൾ, കിണറുകൾ, ശുചീകരണ സംവിധാനങ്ങൾ എന്നിവ സംബന്ധിച്ച് നിർദ്ദേശങ്ങൾ നൽകുക.

ശുചിത്വവും പരിസ്ഥിതി സംരക്ഷണവും 

ശുചിത്വം, പരിസ്ഥിതി സംരക്ഷണം, മലിനീകരണ നിയന്ത്രണം എന്നിവയെക്കുറിച്ച് ബോധവൽക്കരണം നടത്തുക.

സാമൂഹിക ഐക്യം 

പൊതുജനങ്ങൾക്കിടയിൽ ഐക്യവും സൗഹാർദ്ദവും വളർത്തുന്നതിനായി കലാ-കായിക പരിപാടികൾ സംഘടിപ്പിക്കുക.

ഗുണഭോക്തൃ കമ്മിറ്റികൾ 

വികസന പ്രവർത്തനങ്ങൾ നടത്തുന്ന ഗുണഭോക്തൃ കമ്മിറ്റികളെ നിരീക്ഷിക്കുകയും സഹായിക്കുകയും ചെയ്യുക.

ക്ഷേമ പദ്ധതികൾ 

പെൻഷൻ, സബ്സിഡി തുടങ്ങിയ ക്ഷേമ സഹായങ്ങൾക്ക് അർഹരായവരെ കണ്ടെത്തുക.

വിവര പ്രചാരണം 

വികസനവും ക്ഷേമവും സംബന്ധിച്ച പ്രവർത്തനങ്ങളെക്കുറിച്ചുള്ള വിവരങ്ങൾ പൊതുജനങ്ങളിൽ എത്തിക്കുക.

ബോധവത്കരണ പരിപാടികൾ 

ആരോഗ്യ, സാക്ഷരത, വികസന പരിപാടികൾ എന്നിവയിൽ പങ്കാളികളാകുകയും പ്രചാരണം നടത്തുകയും ചെയ്യുക.

അടിസ്ഥാന വിവരശേഖരണം 

സാമൂഹികവും സാമ്പത്തികവുമായ അടിസ്ഥാന വിവരങ്ങൾ ശേഖരിക്കുക.

പുരോഗതി വിലയിരുത്തൽ 

വികസന പ്രവർത്തനങ്ങളുടെ പുരോഗതിയെ സംബന്ധിച്ച രേഖകൾ ശേഖരിച്ച് നൽകുക.

സാമൂഹിക ഉത്തരവാദിത്തം 

നികുതി അടയ്ക്കൽ, വായ്പ തിരിച്ചടവ്, പരിസ്ഥിതി ശുചീകരണം, സാമൂഹിക ഐക്യം എന്നിവ പ്രോത്സാഹിപ്പിക്കുക.

വിഭവ സമാഹരണം 

പഞ്ചായത്തിന്‍റെ ധനാഗമ മാർഗങ്ങൾ വർദ്ധിപ്പിക്കുന്നതിനായി പ്രാദേശിക വിഭവങ്ങൾ സമാഹരിക്കുക.

വികസന പ്രവർത്തനങ്ങളുടെ മേൽനോട്ടം 

സന്നദ്ധ സംഘങ്ങളെന്ന നിലയിൽ വികസന പ്രവർത്തനങ്ങളുടെ മേൽനോട്ടം വഹിക്കുക.

അടിയന്തര പ്രതികരണം 

സാംക്രമിക രോഗങ്ങൾ, പ്രകൃതിക്ഷോഭങ്ങൾ തുടങ്ങിയ സാഹചര്യങ്ങളിൽ സമയബന്ധിതമായി വിവരം നൽകുന്നതിനുള്ള സംവിധാനം ഒരുക്കുക.